Bergen Næringsråd har levert konkrete forslag til korleis KPA 2027 kan bli eit betre styringsverktøy for byen.
Bakteppet er alvorleg. Det blir bygd for få bustader i Bergen, bustadprisane er høge, tilgangen på næringsareal er lav og bedrifter flyttar til omegnskommunane. Samtidig er planprosessane for lange og uføreseielege.
Den nye kommuneplanens arealdel gir Bergen kommune ei moglegheit til å gjere noko med dette.
Bystyret har sjølv slått fast at hovudmålet med revisjonen er forenkling, fortgang og føreseielege plan- og byggjesaksprosessar.
– Bergen Næringsråd støttar målet – og meiner det må gjelde like tydeleg for næringsutvikling som for bustader. No forventar vi at dei politiske ambisjonane om forenkling og fortgang blir følgde heilt ut i dei endelege føresegnene. Bergen treng fleire bustader, fleire arbeidsplassar og eit plansystem som gjer gode prosjekt moglege å gjennomføre, seier administrerande direktør Monica Mæland.
– Høyringsforslaget er eit viktig steg i riktig retning. Men planen har framleis eit betydeleg forbetringspotensial dersom han skal bli det verkemiddelet for bustadbygging, næringsutvikling og raskare saksbehandling som både næringslivet og politikarane ønskjer, seier Mæland.
Breitt arbeid i Bergen Næringsråd
Høyringsuttalen er resultatet av ein brei intern prosess, med innspel frå medlemsbedrifter og ekspertgrupper. Ekspertgruppe byutvikling har hatt hovudansvaret for arbeidet og ei arbeidsgruppe beståande av Olav Pedersen, Ane Ottesen og Christine Flataker Johannessen har samla innspela og utarbeidd den endelege høyringsuttalen.
– Det er lagt ned ein enorm innsats. Eg vil takke alle som har bidratt, og særleg arbeidsgruppa. Olav Pedersen har gjort ein heilt ekstraordinær jobb med å gå inn i detaljane og omsetje erfaringane frå næringslivet til konkrete forslag kommunen kan bruke, seier Mæland.
Leiar for Ekspertgruppe Byutvikling, Christine Flataker Johannessen frå Frydenbø Eiendom, meiner breidda i arbeidet er ei styrke.
– Dette bygger på konkrete erfaringar frå verksemder som arbeider med regulering, bygging, transformasjon og næringsutvikling. Vi har vore opptatt av å ikkje berre peike på problem, men foreslå løysingar, seier ho.
Vil ha «rett på byggesak»
Det viktigaste enkeltgrepet er etter Bergen Næringsråds syn å gi fleire prosjekt rett på byggesak utan først å måtte gjennom ein lang reguleringsprosess.
– Dersom eit prosjekt er i tråd med arealformålet, passar inn i omgjevnadene, har nødvendig infrastruktur og ikkje kjem i konflikt med viktige natur- eller kulturinteresser, bør utgangspunktet vere at ein kan gå direkte til byggjesak, seier Olav Pedersen frå Harris Advokatfirma.
– Skal KPA gi reell forenkling, må det merkast i dei konkrete prosjekta. Elles risikerer vi at gode målsettingar blir borte i detaljerte føresegner.
Bergen Næringsråd ber også kommunen sjå føresegnene betre i samanheng. Eit døme er at kommunen opnar for mindre bustader, samtidig som krav til uteopphaldsareal kan gjere det vanskeleg å bygge fleire bustader.
– Ei forenkling hjelper lite dersom ho blir eten opp av andre krav. Vi må sjå på summen av reglane og spørje om dei faktisk gjer det mogleg å nå måla kommunen har sett seg, seier Ane Ottesen frå Backer Bolig.
Konkrete forslag til kommunen
Høyringsuttalen tar også opp mellom anna arkitekturkrav, støy, parkering, næringsareal og forholdet mellom KPA og eldre reguleringsplanar.
På ei rekkje område har Bergen Næringsråd foreslått konkret ny ordlyd som kommunen kan bruke direkte i det vidare arbeidet.
– Vi ønskjer ein KPA som tar vare på viktige omsyn, men som samtidig gir rom for å utvikle byen. Vi er på god veg. No gjeld det å fullføre jobben og få på plass ein plan som fungerer for innbyggjarane, næringslivet og byen som heilskap, seier Mæland.
– Målet må vere enkelt: Bygg byen betre.
