Fjordtinget er sterkt inspirert av tingsamlingane i vikingtida. Då vart konfliktar lufta, stundom løyste, og folk møttest til sosialt samver. På Fjordtinget i Hardanger kring tusen år seinare ønskjer vi å få til mykje av det samme. Og sjølvsagt vert tingsamlinga trygt leia og losa i hamn av vikingskalden sjølv – Claus Sellevoll!
Dette er noko av det utsendingane til Fjordtinget skal drøfte:
- Som vikingane visste, er havet ikkje berre eit hinder, men framfor noko ei ferdselsåre. Men medan Leiv Eiriksson og hans mannskap sigla vestover, heilt til Vinland, er det i dag politiske straumdrag frå Amerika som går motsett veg. Kva verknader kan dette få for norsk verdiskaping?
- Er det råd å finne den rette balansen mellom vern av natur og kraftbehov?
- Kan flinke folk i 2025 ha arbeidsplassen sin nett kvar dei vil – uavhengig av adressa til hovudkontoret?
- Det er stortingsval til hausten. Kva vil partia gjere for å sikre auka vestlandsk verdiskaping medan fossilindustrien går inn i solnedgangen?
Lingalaks og Bergen Næringsråd er stolte tilskiparar av Fjordtinget. Tinget vert halde på Kunsthuset Kabuso i Øystese, med lunsj servert på Hardangerfjord Hotel.
Det vert også i år skipa til eit fjordtingsgilde på kvelden. Vi inviterer på båttur til Rossholmen ytst i Fyksesund, der Lingalaks byr på god sjømat og strålande utsikt mot Hardangerfjorden og Folgefonna.
Ver velkomne, frendar!
Betre børi du ber’kje i bakken
enn mannevit mykje
D’er betre enn gull
i framand gard;
vet er vesalmanns trøyst.
- Frå Håvamål
I samarbeid med
